[突發]
記者唱起「甚麼意義、甚麼意義」，霑叔聞言即謂：「咪係鱷魚淚，啲鱷魚一路食嘢一路分泌返啲鹽水出眼，平衡身體鹹度，呢啲假眼淚，咪係鱷魚淚囉。」
霑叔為《鱷魚淚》電視劇寫下同名主題曲，家傳戶曉。《鱷魚淚》故事講主角不擇手段躋身上流社會，最後覺得自己出賣靈魂，夜深淚流的一個故事。但霑叔認為「阿鼎」是良心泯滅，咎由自取的，在鏡頭前哭是「呃鬼」之舉。霑叔直言，「鼎你喊都無用，啲人信你就戇居，啲市民可能係蠢，但多數都唔係傻，你做過咩，大家都不言而喻，你扮喊苦喊忽更加欲蓋彌彰。」
記者希望霑叔講多兩句，但霑叔指「垃圾講幾多都仲係臭」，認為只宜「掃走佢」，並指自己對電視台用簡體字有意見。
霑叔直言：「香港有生意就做，呢度好多醒目仔，華語片觀眾畀到錢的時間，啲投資者咪會投資華語片，到講廣東話的普羅大眾有消費力，大家就會拍返粵語片，宜家電視台唔係畀香港人睇架啦，佢地淨係掛住搵食，係唔會諗咩良心。」霑叔續指：「做人無良心，夜晚瞓都瞓得唔安樂。你信咩就做咩，頂天立地就得。」
但黃湛森博士認為，其實只要大家堅持，懂寫正體字、用正確恰當的廣東話創作，香港文化仍然有新天，他指：「香港的路一直都唔會人地幫你開架，唔通你坐定定就會發達咩。學果個咩鼎扮住喊話齋：『香港唔係咁架』，路係自己行出黎。你唔學唔做唔努力，人地就唔會畀機會你，醒目仔黎家嘛，你地要爭氣！」
