[本報訊]
葉繼歡（1961-2017）病死後，本報聯絡皇家香港警務處處長李君夏（1937-2017）評論香港治安問題。
李君夏直言：「香港人守法易治，所謂治安問題，其實都不是甚麼問題的。相較當年，你們今天有甚麼問題？」李君夏表示：「後生，你細個果時都有悍匪架，家陣香港仲邊度有人會真槍實彈打劫呀？」
李君夏並無等記者追問，直接講：「八十年代初的大陸，鄧小平要改革開放，中國越南打完仗，大陸就大手裁軍，所謂裁軍，咪即係擴大失業大軍，香港食好住好著好，唔落黎香港食大茶飯仲可以去邊？況且當時響大陸買軍火都唔係咩難事，你地睇新聞紙都見，張子強、葉繼歡可以響大陸準備好多炸藥落黎都得，咁社會一定有治安問題架。」
「香港係寶，一座寶山咁多的寶，物華街幾多金舖？」李君夏繼續說。記者問，為甚麼今日彌敦道上金舖林立，但悍匪卻不比從前的多，李君夏笑說：「你打劫完金舖都買唔到樓啦傻仔。今日香港一樣有從大陸走私來的槍械，之前響九龍啟德，近來我睇你地都有報，響將軍澳嘛，其實一樣有『潛在危險』架，軍火供應國無變，問題依然有架。不過關鍵因素唔同左。」
記者大惑不解，李君夏笑稱：「1982年中英談判，咁中國唔通直接派兵黎騷擾你香港咩？淨係供應軍火畀失業軍人，就夠玩殘你個社會，令到香港政治有管治危機啦！成個八十年代我地就算改善裝備都唔夠啲賊攞AK-47黎架，個個有家爺仔乸要養，蓋國旗都唔能咁蓋咁多。後來唯有同中國政府再談判，所以先收斂返啲。」
被問及今日警隊形象惡劣，李君夏嘆息：「害群之馬幾時都有，今日社會反常咁安定，無人覺得警察係除暴安良，反而覺得警察係欺壓市民、為虎作倀，咁都係時勢呀。再講，個社會人人識玩制度、呢班武夫唔係用呢啲你地眼中野蠻的手法又可以點，係好多衰人架啦，而且今日搶你錢的，未必係大賊添啦。不過都係安定好、你見人人都話太平架，唔通個社會人人提心吊膽好咩？」
記者指，不少人在示威中被警察追打、甚或因為網上言論被捕，面對無路可訴的暴力、所謂太平，其實一樣是提心吊膽，而且這些驚惶更是無可宣泄，李處長只見其一，未見全局，恐怕有欠公平。李君夏笑答：「阿SIR做事使唔使你教？得你同你老闆覺之嘛，其他人好安樂呀。咪唱衰香港呀！」
