「爸爸！！我覺得龍門哥哥好型，佢球球都救到，好勁呀！我大個想做守門員。」一道天真無邪的聲音如是說。他很久沒在家看電視了，今天走運，爸爸回家，說一定要看這場港中大戰。
守和了，全家歡聲震天。爸爸還開了罐啤酒來慶祝，他這刻為自己買到了港隊作客白色球衣而自豪，也抱住了自己的愛子。
「爸爸，呢個綠色衫哥哥好有型呀。我大個要好似佢咁有型。」爸爸沒說話，呷了大口的啤酒，摸了摸兒子的頭。 屏幕一黑。煩人的鍾志光聲音消失，換來的是一本補充練習和媽媽的聲音。
「好啦和仔，睇完電視啦，要過黎做練習，唔係呈分試考唔好就入唔到皇仁架啦。」 和仔很聽話的坐到餐桌旁。爸爸還在沙發飲啤酒。媽媽在燈光下，看起來很大。
「媽媽。」
「咩事呀？呢題數唔識做呀？」
「唔係呀。」
「咁快啲做啦，計緊時架。」這四個字像咒語般令和仔默默低頭做「通分母」，後面還有好幾頁的分數四則運算。
「媽媽。」
「又咩事呀。」
「下個學期可唔可以去參加足球訓練班。我大個想做足球員──」
「唔得呀。做埋啲數學先。」
「做完係咪可以報名？」和仔一面可憐的問。
「唔得呀。你上年咪玩左囉，你踢完波就成身污糟曬添。乜興趣都可以學，但唔可以沉迷。入唔到Band One學校架會。」
「但係邱教練話我有天份會係個叻的龍門喎。」
「和仔，你係咪唔聽話？」 說到這兒。和仔講不過媽媽，哭了。
「唔好喊呀，你未做完架。仲計緊時。」 一臉酒紅的爸爸走過來，扭住和仔，說：「爸爸媽媽都係為你好架和仔。」
爸爸蹲下來和和仔說：「做足球員養唔到家架。爸爸媽媽想你讀好書，你大個就會搵到份好工。咁大個就可以照顧自己啦，知唔知？」
「唔好阻住和仔啦爸爸。佢仲未做完數。」
媽媽說。「你飲醉就沖涼翻房瞓。」 和仔還在哭，哭得越來越狠。媽媽搖搖頭，掀出紙巾盒的兩塊面紙給和仔，自己拿了一張，躲在廚房偷印拭眼淚。
和仔哽咽、忍著淚，在草稿紙上畫了一個火柴人，那個正在撲球的火柴人。 鉛筆還寫下小字：「We are Hong Kong.」